മഴയോര്‍മ്മകള്‍

മടി പിടിച്ചോരോ പനി കാലങ്ങള്‍ക്കും
മഴ പെയ്യുമോരോ ഇടവ രാത്രികള്‍ക്കും
പറയാനുള്ളത് നഷ്ടങ്ങളുടെ കണക്കും
വേര്‍പാടിന്റെ വേദനയുമാണ്‌. 

ആന

ദൂരേകകറ്റുന്ന ഭയപ്പാടല്ല,
നെഞ്ചോടടക്കുന്ന സ്നേഹമാണാന.

ഗുരു ദക്ഷിണ

നന്ദി . .. 
അറിവിന്റെ ആദ്യാക്ഷരത്തിന് . . .
അതിരുകളില്ലാത്ത സ്നേഹവായ്പിനു . . .
ചൂരലിന്റെ കുഞ്ഞു നോവിനു . . .
അനന്ദമായ വിജ്ഞാനത്തിനു . . .
ദീപ്തമായ തിരിച്ചറിവുകള്‍ക്ക് . . .
കളങ്കരഹിതമായ മാതൃകകള്‍ക്ക് . . . 

പുഴ യാത്ര

ഈ പുഴയുടെ മറുകരയിലെവിടെയോ 
നീയുണ്ടെന്നുള്ള തിരിച്ചറിവിലാണ് എന്റെ ഈ യാത്ര.
അറിയില്ല , നിന്നിലേക്കെത്താനാവുമോയെന്നു.
എങ്കിലും ഒന്നുറപ്പാണ്.
ഒരിക്കല്‍ നിന്നെ പുല്‍കിയ ഈ ജലകണങ്ങളാകും-
എന്നിലേക്കെത്തുന്ന അവസാന തുള്ളി . . . 

നഷ്ടം

നിന്റെ നഷ്ടം, 
അത് ഞാന്‍ തന്നെയായിരിക്കും,എക്കാലവും.
എന്റെതോ?
നിനക്കു വേണ്ടി ചിലവഴിച്ച നിമിഷങ്ങളും.

ഒരിക്കല്‍ക്കൂടി

ഈ കടൽക്കരയിൽ ഒരസ്തമയം കൂടി നീയെനിക്ക് തരണം. ഒരിക്കൽക്കൂടി കോർത്തിണക്കിയ കൈകളുമായി തിരയെ പുൽകി നമുക്ക് നടക്കണം.

ഒരു കുഞ്ഞുറുമ്പിന്റെ കുസൃതിയോടെ നിന്നിലൂടെനിക്ക് വിരലോടിക്കണം.

ആ ചിരി പടർത്തുന്ന സ്പന്ദനങ്ങൾ എനിക്ക് തൊട്ടറിയണം. നീ തന്ന നൂറുമ്മകൾക്ക് പകരമായി ആ തിരുനെറ്റിയിൽ എനിക്കൊരുമ്മ വയ്ക്കണം.

ഇനിയൊരിക്കലുമില്ലെന്നുറച്ച് നിന്റെ മുഖത്തേക്കെനിക്ക് നോക്കണം. അവസാനമായ്. . . നീയെന്റെയല്ലെന്നുറപ്പിച്ച് നിന്നിൽ നിന്ന് നടന്നകലണം. 

രാത്രി യാത്ര

എനിക്കേറെ ഇഷ്ടമാണ് , മഴയൊലിച്ചിറങ്ങുന്ന ഈ രാത്രിയാത്ര.
ദൂരെ നിന്നും മൂളി വരുന്ന തീവണ്ടിയും,
പല ലക്ഷ്യങ്ങളിലേക്കായി പോകുന്ന ആയിരങ്ങളും.
ജനലഴിയിലൂടെ പുറത്തേക്ക് നീളുന്ന കണ്ണുകള്‍ക്ക് 
കാഴ്ചകള്‍ അനന്തമാണ്‌. 
വിദൂരതയിലേക്ക് ചെവിയോര്‍ത്താലറിയാം 
കുഞ്ഞിനെ ഉറക്കുന്ന അമ്മതന്‍ താരാട്ട്.
ഉള്ളിലേക്കെടുക്കുന്ന ഓരോ ശ്വാസനിശ്വാസങ്ങളിലും 
പേരറിയാത്ത പല പൂക്കളുടെയും ഗന്ധം.
രാത്രിമഞ്ഞിന്റെ തണുത്ത മൂടുപടം
രോമാരാജിയില്‍ ഉണ്മാദമായി ഒഴുകിയലിയുമ്പോള്‍, 
നിദ്ര തന്‍ നേര്‍ത്ത സ്പര്‍ശം എന്നെ തേടി വരും.
ഊര്‍ന്നു വീഴുന്ന ജനല്‍ പാളികള്‍
ബോഗിക്കകത്തേക്കെന്‍റെ ശ്രദ്ധ ക്ഷണിക്കും.
അടുത്തിരിക്കുന്ന ഓരോ മുഖങ്ങളും
പല കഥകള്‍ പറയാന്‍ തുടങ്ങും.
രാത്രി വണ്ടിയുടെ സ്നേഹലാളനത്താല്‍ 
എപ്പോഴോ ഞാനും ഉറക്കത്തിലേക്ക് വീഴും,
പുലരിയില്‍ പുതിയ പ്രതീക്ഷയുമായുണരും വരെ. . .

ചുരുട്ട്

ചുണ്ടില്‍ ചിതയെരിയുന്നവന് 
മണ്ണിലേക്കുള്ള ദൂരം വളരെ കുറവാണ്. . .